2022 жылғы 22 сәуір күні Қазақстан-Британ техникалық университетінде «Ұлт ұстазы» атанған  қоғам қайраткері, ғалым, әдебиетіміздің көрнекті өкілі Ахмет Байтұрсыновтың 150 жылдық мерейтойына орай студенттер арасында ақын шығармаларын мәнерлеп оқудан «Ел бүгіншіл, менікі ертең үшін...» атты  байқау өтті.  

Байқауды ұйымдастырып өткізуге университеттің тәрбие ісі жөніндегі бөлім, Ғылыми кітапхана қызметкерлері мен қазақ тілі оқытушылары атсалысты. Ақын өлеңдерін мәнерлеп оқуға бақ сынасып көруге 40 студент тіркелді.   Байқау шымылдығы ҚБТУ домбырашыларының  күмбірлеген күйімен  ашылды.  

Әділқазылар алқасы ретінде шақырылған  А.Байтұрсынұлы атындағы «Тіл білімі институтының» Грамматика бөлімінің меңгерушісі, ф.ғ.д., профессор  Момынова Бағдан Қатайқызы, А.Байтұрсынұлы музей үйінің  ғылыми қызметкері, ақын, аудармашы Айбек Ережеп  құттықтау сөз сөйледі,   олар тарихқа шолу жасай отырып, студенттерге А.Байтұрсынұлының өмірінен қызықты деректер келтірді, тіл білімі саласындағы ерен еңбегін атап көрсетті.  

Жарыс барысында  студенттер ақын қаламынан шыққан алуан тақырыптағы өлеңдерді ортаға салды,  барлығы да жоғары дайындықпен келіп, өнер көрсетті. Әділқазылар 40 студент арасынан 6 көркемсөз оқу шеберін анықтап, жүлделі орындармен марапаттады. Барлық қатысушыларға алғыс хаттар тапсырылды.  

Іс-шара аясында  студенттер «Ахмет. Ұлт ұстазы» деректі фильмінен  үзінді тамашалады. Сұрақ-жауап викторинасы жүргізілді.   Байқау оқытушы А.Жұмаштың орындауында     «Қазақ елі» әнінің шырқалуымен аяқталды.  

А.Байтұрсынұлының мерейтойына арналған  іс-шаралар келесі оқу жылы жалғасын таппақ.