Инструкция на Заявку на общежитие

Памятка для проживающих

KBTU JASTAR CITY – бұл өмір сүруге, білім алуға және демалуға барлық жағдай жасалған 5 корпустан тұратын жаңа буын жатақханасы. Заманауи және өмір сүруге қолайлы 1, 2, 3 және 4 орындық бөлмелер жиһаздармен және интернетпен (wi-fi), сондай-ақ оқуға арналған ортақ кеңістіктермен қамтамасыз етілген. Тұрмыстық бөлмелер автоматты кір жуғыш машиналармен және үтіктеу тақталарымен жабдықталған. Оқу залында мерзімді басылымдарды да қоса қамтитын ауқымды кітапханасы бар. Жыл сайын жиһазы мен тұрмыстық техникасына жөндеу жұмыстары жүргізіліп, жаңартылып отырады. Жоспарлы түрде аумақты, бөлмелерді, жертөлелерді дератизациялау, залалсыздандыру, төсек-орындарды термиялық өңдеу, кілемдер мен жұмсақ жиһаздарды химиялық тазалау, тұрмыстық техниканы жөндеу, өрт сөндіргіштерді қайта зарядтау, қоқыстарды шығару жұмыстары жүргізіледі.

2023 жылдың желтоқсан айында студенттердің бос уақытын ұйымдастыру бойынша түрлі іс-шаралар өткізуге, өмір сүруге  және білім алуға қолайлы жағдай тудыратын заманауи талаптарға сай 980 төсек-орындық тоғыз қабатты екі жаңа тұрғын үй пайдалануға берілді.

Корпустарда демалыс бөлмелері, асүйлер, оқу бөлмелері, 120 орындық акт залы, 70 орындық асхана бар. Әрбір корпус 2 жүрдек лифтілермен жабдықталған, бейнебақылау камералары және Wi-Fi қосылу нүктелері орнатылған, әр бөлмеде жуыну бөлмелері мен әжетхана бар, мүмкіндігі шектеулі студенттердің тұруына арналған бөлмелер қарастырылған. Жаңа корпустардың жалпы ауданы – 14 320 ш.м., соның ішінде тұруға арналғаны – 6 109.4 ш.м.

Инфрақұрылым

Инфрақұрылымы дамыған ауданда орналасқан тұрғын үй кешенінің жалпы аумағы 1 гектардан асады. Супермаркеттер, банкоматтар, дәріханалар, аялдамалар және т.б. қажеттіліктер мен мекемелер жақын жерде орналасқан.

Жатақханада тамақтану мәселелері де шешімін тапқан. Арзан әрі дәмді тағамдар ұсынатын асханалар мен буфет жұмыс істейді. Тұратын студенттердің сұраныстарына уақытылы жауап беру мақсатында Service Desk жүйесі әзірленіп, қолданылуда.

Студенттік кеңес және бос уақыт

KBTU JASTAR CITY-де тұрмыстық жағдайды жақсарту, коммуникация, бос уақыт шараларын ұйымдастыру, тәртіптік отырыстардың жұмысына қатысу, студенттердің тұру ережелерін сақтауына тексерулер мен мониторинг жүргізу мәселелері бойынша жатақхана әкімшілігімен бірлесіп іс-әрекет ететін Студенттік кеңес жұмыс істейді.

Жатақханада тұрақты негізде мынадай іс-шаралар өткізіледі: қызықты спикерлер шақырылатын қонақтық дәрістер, спорттық іс-шаралар, кино кештері, зияткерлік ойындар, киберспорттық жарыстар мен сенбіліктер.

Медициналық көмек және қауіпсіздік

Жатақханада тұратын студенттерге, магистранттарға және қызметкерлерге алғашқы консультациялар беру, дәрігерге дейінгі алғашқы медициналық көмек көрсету мақсатында жаңа екі ғимаратта да заманауи құрал-жабдықтармен және жұқпалы аурулармен ауыратын науқастарға арналған изолятормен жабдықталған медициналық кабинеттер ұйымдастырылған. Қабылдауды жатақхананың білікті медицина қызметкері, сондай-ақ тұрақты негізде болатын «Qamqor Сlinic Almaty» медициналық орталығының дәрігері жүзеге асырады. Бұл мед. орталықпен «ҚБТУ» АҚ студенттерге медициналық көмектің кепілдік берілген көлемі және міндетті әлеуметтік медициналық сақтандыру шеңберінде медициналық көмек көрсету туралы келісімшарт жасасты.

Тұрғындардың қауіпсіздігін қамтамасыз ету үшін 2023 жылы қолданыстағы Қолжеткізуді бақылау және есепке алу жүйесі заманауи жабдықтармен толығымен ауыстырылды және қазіргі уақытта KBTU JASTAR CITY-ге студенттер мен қызметкерлерді қабылдау турникеттерде және есіктерде орнатылған Face-ID тұлғаны тану жүйелері арқылы жүзеге асырылады. Аумақта және жалпы аумақтардағы бейнебақылау камералары, олардан ақпарат жатақхана аумағында 2024 жылы жабдықталған жағдай орталығына түседі.

Орындарды бөлу тәртібі

KBTU JASTAR CITY-де орындарды бөлу кезінде басымдық берілетін әлеуметтік санаттардың тізімі:

 - ата-анасының қамқорлығынсыз қалған жетім балалар, қамқорлықтағы жетімдер, кәмелетке толғанға дейін ата-анасының қамқорлығынсыз қалған жастар қатарындағы адамдар;

- мүгедектер қатарындағы мүмкіндігі шектеулі студенттер, бала кезінен мүгедектер;

- ата-анасы/ата-анасының бірі І, ІІ топтағы мүгедек болып табылады;

- жеңілдіктер мен кепілдіктер бойынша Ұлы Отан соғысының қатысушылары мен мүгедектеріне теңестірілген адамдар;

- шетел азаматтары;

- ауылдың әлеуметтік-экономикалық дамуын айқындайтын білім беру бағдарламалары бойынша оқуға түскен ауыл жастары арасынан шыққан тұлғалар;

- қандастар, Қазақстан Республикасының азаматтары болып табылмайтын тұлғалар;

- «Алтын белгісі» бар 1 курс студенттері, президенттік, халықаралық, республикалық олимпиаданың және (немесе) конкурстың жеңімпазының сертификаты, сондай-ақ оқу орнын үздік бітірген білімі туралы растайтын құжаты бар (куәлік, сертификат, диплом) талапкерлер;

- мемлекеттік білім беру тапсырысы бойынша бірінші курсқа оқуға қабылданған, Ұлттық бірыңғай тестілеудің немесе ұйым өткізген кешенді тестілеудің нәтижелері бойынша жоғары балл жинаған студенттер;

- көп балалы отбасылардан шыққан, көп балалы болуына байланысты жәрдемақы алатын балалар;

- атаулы әлеуметтік көмек алатын аз қамтылған отбасылардан шыққан балалар;

- оқу және ғылыми жұмыстарда жоғары нәтижелерге қол жеткізген, сондай-ақ университеттің студенттік өміріне белсене араласатын жоғары курс студенттері.

    Жоғарыда аталған тармақтарға қатысы жоқ барлық басқа санаттар басымдық тәртібімен жалпы негізде қарастырылатын болады.

          Орналасуға арналған құжаттар:

1) №2 қосымшаға сәйкес нысан бойынша жатақханадан орын беру туралы өтініш «Орын беру және тұру тәртібі»;

2) жеке басын куәландыратын құжат (сәйкестендіру үшін);

3) егер тұруға жеңілдіктер беретін кез-келген әлеуметтік санат болса, тиісті растайтын құжаттарды ұсыну қажет.

          Қоныстандыру тәртібі:

1. KBTU JASTAR CITY медициналық қызметкерінен рұқсат алу;
2. Тұру шартына қол қою;
3. Шартта көрсетілген мерзімге төлем;
4. Төлемді төлегеннен кейін бөлменің кілтін алыңыз және тіркеуден өтіңіз.

Мекенжайы: Ислам Каримов көшесі, 70

Әкімшілік байланысы:

1. Директор Қасымов Дулат Доскелдіұлы  тел. 357-42-42, ішкі. 600  e-mail: Этот адрес электронной почты защищен от спам-ботов. У вас должен быть включен JavaScript для просмотра.
2. Комендант Есімбекова Айжан Берікқызы тел. 357-42-42, ішкі. 601  e-mail: Этот адрес электронной почты защищен от спам-ботов. У вас должен быть включен JavaScript для просмотра.