2022 жылдың 18 қарашасы күні Қазақстан-Британ техникалық университетінде Ахмет Байтұрсынұлы атындағы дәрісхананың салтанатты ашылу рәсімі өтеді.  Соңынан республикадағы ғылыми-зерттеу институттары мен жоғары оқу орындарының көрнекті ғалымдарының қатысуымен  «Ахмет Байтұрсынұлы – ұлы ғалым, ұлт қайраткері» тақырыбындағы Дөңгелек үстел ұйымдастырылады.

Атаулы дәрісхана  Ұлт ұстазы, ұлы ғалым, аса көрнекті мемлекет және қоғам қайраткері  Ахмет Байтұрсынұлының ЮНЕСКО деңгейінде тойланып отырған 150 жылдық мерейтойына орай  ашылып отыр. Салтанатты рәсімде Қазақстан-Британ техникалық университетінің ректоры, физика-математика ғылымдарының докторы, профессор Маратбек Төлепбергенұлы Ғабдуллин мен Қазақстанның көрнекті ғалымдары – ҚР Ұлттық ғылым академиясының академигі Мәмбет Қойгелдиев, ҚР Ұлттық ғылым академиясының корреспондент-мүшесі Фаузия Оразбаевалар лента қияды. Ұлттық дәстүрімізге сай шашу шашылады. ҚБТУ студенттері ғалымның мерейтойы құрметіне арнау айтады, ақын өлеңдері оқылады, соңғы жылдарға дейін авторын атауға тыйым салынып келген Ахаң әндері орындалады,.

Республикадағы техникалық жоғары оқу орындары арасында алғашқы болып «Абайтану» пәнін оқу жоспарына енгізген бұл университет басшылығы өз студенттеріне сапалы жоғары білім берумен қатар, олардың мемлекетшілдік рухын дамытуға, елжандылық қасиеттерін қалыптастыруға да ерекше көңіл бөліп отырады. Ахмет Байтұрсынұлының атаулы дәрісханасында университет студенттері Ұлт қайраткерінің ғұмырнамалық-шығармашылық жолымен танысады. Ұлт ғылымының көшбасшысы, Алаш орда Үкіметі көсемдерінің бірі Ахмет Байтұрсынұлының халық тарихындағы орнын, ешқашан құнын жоғалтпайтын зерттеу еңбектерінің ұлт  руханиятындағы  маңызын тани отырып, тұлғалық қабілеттері шыңдалады, кәсіби-зияткерлік әлеуеті арттырылады.

Ұлыны ұлықтау шарасы «Ахмет Байтұрсынұлы – ұлы ғалым, ұлт қайраткері» тарыбындағы Дөңгелек үстелге жалғасады. Онда ахметтану саласында зерттеу жұмыстарын жүргізіп жүрген көрнекті ғалымдар Ахаң мұраларына қатысты ой-пікірлерімен бөліседі. Салтанатты рәсім соңында қазақ кино өнерін жаңа белеске көтерген «Ахмет – Ұлт ұстазы» фильмінің режиссерлерімен, актерлерімен сұқбат жүргізіледі.

Күні: 18 қараша 2022 жыл.

Мекенжайы: Алматы қаласы Төле би көшесі, 59. Қазақстан-Британ техникалық университетінің ғимараты. 3-қабат 382-аудитория және 4-қабат al-Farabi Нall

Басталуы: 15:00