2021 жылдың 24-27 қараша аралығында жоғары оқу орындары мен ҚР халықаралық бакалавриаты бар мектептер үшін "ҚБТУ-дағы шахмат семестрі" командалық турнирі өтті. Өткен жылдардағыдай, турнир швейцарлық жүйе бойынша халықаралық шахмат федерациясының (ФИДЕ) ережелері бойынша 9 турда өтті.

Турнирге 24 команда қатысты, олардың әрқайсысы 9 тур ішінде мақтауға тұрарлық ойын көрсетті. Жақында өткен "KBTU GOLDEN JUBILEE" турнирінен кейін ойыншылар қалаған нәтижеге аса мән берді.

Командалық есепте үздік үштікті атап өтеміз. ҚБТУ-1 командасы өздерін алаңның нағыз шебері ретінде көрсете отырып, 1 орынға жайғасты. Команда құрамында келесі студенттер болды: Тимур Нұржанов (БШ, 3 курс), Әбілмансәр Әбділхаир (ФЭиНГИ, 1 курс), Айбек Катенов (ФИТ, 1 курс) және Жаңыл Өтеуова (БШ, 1 курс). РФММ командасы 2 орын алды, ал Satbayev University-1 құрамасы үштікті жапты.

Тақта бойынша турнир жеңімпаздары:

1 тақта:

1. Тимур Нұржанов (ҚБТУ-1)

2. Заманбек ЕРҒАЛИҰЛЫ (Нархоз-1)

3. Мейірбек Қылышбаев (ҚазҰПУ-1)

2 тақта:

1. Әбілмансұр ӘБДІЛХАИР (ҚБТУ-1)

2. Артемий ПАК (НЗМ ФМБ)

3. Әмір ИГЕН (РФММ)

3 тақта:

1. Айбек ҚАТЕНОВ (ҚБТУ-1)

2. Бибарыс Тәңірбергенов (РФММ)

3. Ғажайып Мұқажанов (ҚБТУ-2)

4 тақта:

1. Айша АЛЕН (РФММ)

2. Айя Жүнісова (НЗМ ФМБ)

3. Далия ДИАСКЫЗЫ (МША)

Салтанатты жабылу рәсімі турнир сияқты кең көлемде өтті. Дәстүр бойынша турнирдің бірде-бір қатысушысы сыйлықсыз қалған жоқ, ал жүлделер мен сыйлықтарды Бастау факультеттің профессоры, гроссмейстер Владимиров Е.Ю. және ҚБТУ басшылығының өкілдері: ректордың м.а. Габдуллин М.Т. және Бастау факультеттің деканы Бейсенов Р.Е. табыс етті.

Габдуллин М.Т. өз сөзінде командаға турнирге қатысқаны үшін алғысын білдіріп, жеңістерімен құттықтап: "Ең үздік капитал салымы – бұл білім беруге, дамуға салынған инвестиция. Сондықтан Сіз дұрыс жолдасыз!» деді.

Диана СЕРІКБАЕВА (ФЭиНГИ, 1 курс)