Қазақстан Республикасы Президентінің жанындағы Қазақстан Республикасының Ұлттық ғылым академиясы Президент жолдауы аясында «Қазақстан ғылымының қазіргі жағдайы мен даму перспективалары» тақырыбында ғылыми-практикалық конференция өткізді

2024 жылғы 16 қыркүйекте Алматыда «Қазақстан ғылымының қазіргі жағдайы мен даму перспективалары» тақырыбында ғылыми-практикалық конференция өтті. Конференцияны Қазақстан Республикасы Президентінің жанындағы Қазақстан Республикасы Ұлттық ғылым академиясы Қазақстан-Британ техникалық университеті ғимаратында ұйымдастырды. Ғылыми іс шара Президент Жолдауында көрсетілген ғылымды дамытудың негізгі мәселелерін талқылауға арналған маңызды алаңға айналды.

Конференцияға ҚР Ғылым және жоғары білім министрлігінің өкілдері, ҚР Президентінің жанындағы ҚР ҰҒА академиктері, жоғары оқу орындары мен ғылыми-зерттеу институттарының басшылары, еліміздің және шетелдің жетекші ғалымдары, тәуелсіз сарапшылар, сондай-ақ отандық ғылымды дамытуға белсене атсалысатын дарынды жас ғалымдар қатысты.

Қазақстан-Британ техникалық университетінің ректоры (Басқарма төрағасы) М.Т. Габдуллин Қазақстанның кадрлық әлеуетін дамыту үшін болашақ мамандарды даярлау тақырыбында маңызды кезеңдерді атап өтті:

«Отандық ғылымды дамыту мен кадрларды дайындаусыз кез келген технологиялық прогресс мүмкін емес. Ғылыми зерттеулер практикалық маңызға ие болып, қоғамымыздың өмір сүру деңгейін арттыруға бағытталған нақты нәтижелер беруі тиіс. Осы бағытта Қазақ-Британ техникалық университеті бәсекеге қабілетті, білікті және жоғары білімді мамандарды даярлауда белсенді жұмыс істеп келеді. Біз қазіргі уақытта елдің және әлемдік экономиканың даму кезеңінде жоғары оқу орындарының міндеті тек академиялық білім беру ғана емес, сонымен қатар түлектерді қазіргі заманғы сын-қатерлерге бейімделуге және жылдам өзгеріп жатқан әлем жағдайында табысты бейімделуге көмектесетін практикалық және бейресми дағдылармен қамтамасыз ету екенін түсінеміз».

Қатысушылар Президент Жолдауы аясында Қазақстан ғылымының қазіргі жағдайы мен даму болашағын талқылады. Спикерлердің басты назары ғылымды цифрландыру, жасанды интеллектті дамыту, денсаулық сақтау жүйесін реформалау қажеттілігі, Қазақстан Республикасында ауыл шаруашылығын дамытуға бағытталған мемлекеттік қолдау шараларын жетілдіру және Мемлекет басшысының Жолдауында көрсетілген басқа да маңызды мәселелерге аударылды. Азаматтық қоғамды нығайтудың, әлеуметтік әділеттілік пен азаматтардың қауіпсіздігін қамтамасыз етудің өмір сүру үшін қолайлы және қауіпсіз орта құру стратегиясының маңызды элементтері ретіндегі маңыздылығы жеке атап өтілді.

Инновациялық технологияларды енгізуді, ирригациялық жүйелер мен инфрақұрылымды жаңғыртуды, сондай-ақ қазіргі заманғы су үнемдеуші технологияларды қолдануды қоса алғанда, Қазақстанның ауыл шаруашылығы өнімдерінің халықаралық нарықтарда бәсекеге қабілеттілігін арттыруға мүмкіндік беретін аграрлық секторды дамытуға ерекше назар аударылды.

Сондай-ақ, тұрақты энергетикалық даму мен елдің энергетикалық қауіпсіздігін қамтамасыз ету шешімдерінің бірі ретінде атом электр станциясын (АЭС) салу мүмкіндігі талқыланды.