2023 жылы 15 сәуірде ҚБТУ-да Алматы қаласының техникалық жоғары оқу орындары студенттеріне арналған ағылшын тілі олимпиадасының екінші әрі  соңғы кезеңі  болып өтті. Бірінші күннің қорытындысы бойынша финалға өткен 13 қатысушыға шешен сөйлеу дағдыларын, БҰҰ-ның 2030 жылға дейінгі Тұрақты Дамуының 17 Мақсатын білуін, ТДМ тезаурусын меңгеруін көрсету мүмкіндігі берілді. Спикерлер екінші тур тапсырмасын мазмұны және жеткізу формасы бойынша белгіленген уақыт шеңберіне сәйкес тамаша орындады. Олимпиада әділқазылары алқасының талқылау қорытындысы бойынша 3 жүлдегер анықталды: бірінші орынды ХАТУ студенті Айгерим Сеитова, екінші орынды – Тұран университетінен Дана Калмагамбетова, үшінші орынды – ҚБТУ студенті Ернур Купешев жеңіп алды. Қосымша номинациялармен Тұран университеті студенттері Мадина Люходжаева мен Алишер Сейдуманов, ҚБТУ студенті Аржан Асангалиев марапатталды. Қалған финалистерге ынталандыру сыйлықтары тапсырылды.

Олимпиадамыздың жеңімпаздарын, жүлдегерлерін және барлық қатысушыларын құттықтаймыз! Тұран университеті бастамасымен Алматы қаласының техникалық жоғары оқу орындары мен мамандықтарының студенттеріне арналған ағылшын тілі бойынша келесі олимпиаданы өткізу құқығы, дәстүр бойынша жеңімпазға – Халықаралық ақпараттық технологиялар университетіне өтеді.