«ҰАК „Қазатомпром"» АҚ және Қазақстан-Британ техникалық университеті (ҚБТУ) Қазақстанның уран өнеркәсібі үшін мамандар даярлаудағы өзіндік бірегей «Уран ісі» білім беру бағдарламасы бойынша бірлескен жобаны іске асыруда. Бағдарлама ағымдағы оқу жылында іске қосылып, үздіксіз жетілдіріліп келеді. Тараптар саланың нақты қажеттіліктері мен озық халықаралық тәжірибеге сүйене отырып, оны өзектілендіру жұмыстарын жүргізуде. Компания оқу үдерісін қалыптастыруға белсене қатысуда, «Қазатомпром» мамандары студенттерге жүйелі түрде қонақ дәрістерін оқып, практикалық тәжірибемен және саладағы өзекті білімдерімен бөлісуде, сондай-ақ оқу тәжірибелерін ұйымдастыру мен өткізуге қатысуда. Өзара іс-қимылдың мұндай форматы болашақ инженерлерге бірінші курстан бастап нақты өндірістік ортаға еніп, оқу кезеңінде-ақ кәсіби байланыстар орнатуға мүмкіндік береді.
Осы ынтымақтастық рухына сай, 2026 жылғы 31 наурызда «Уран ісі» бағдарламасының бірінші курс студенттері «Қазатомпром» құрылымындағы негізгі кәсіпорындардың бірі — «Волковгеология» АҚ-на барды. Бару компанияның мұражайы бойынша танымдық экскурсия форматында өтті: болашақ мамандар уранның ашылу тарихымен, оның әлемдік және отандық өнеркәсіп үшін маңызымен, сондай-ақ Қазақстандағы геологиялық барлау саласының даму кезеңдерімен танысты.
Мұражай залдарында тау жыныстарының үлгілері, минералдар және уран өндіру процестерінің ауқымы мен күрделілігін көрнекі түрде демонстрациялайтын мамандандырылған жабдықтар ұсынылды. Экспозицияларда қазақстандық ғалымдардың жетістіктері және кәсіпорынның елдің минералды-шикізат базасын нығайтуға қосқан үлесі бейнеленді. Геологиялық барлау жұмыстарының нақты үлгілері ерекше қызығушылық тудырды. Болашақ инженерлер теориялық білімдерін кеңейтіп қана қоймай, өз болашақ мамандығының практикалық жағын да көре алды.
Мұндай кездесулер білім мен өндірістің арасындағы байланысты нығайта отырып, студенттерге Қазақстан экономикасының негізгі салаларының бірінде мансаптық өсудің нақты перспективаларын ашады.